News

टिपरको ठक्करबाट कार चालकको मृत्यु, प्रहरी भन्छ- ‘कारकै गल्ती’

धादिङको गजुरीमा बिहीबार काठमाडौंतर्फ आउँदै गरेको बा४च २७९ नम्बरको मारुती अटो कारलाई काठमाडौंबाट गजुरीतर्फ जाँदै गरेको बा३ख ७३९३ नम्बरको टिपरले ठक्कर दियो । ठक्कर पछि ३३ वर्षीय चालक प्रकाश अधिकारीको घटनास्थलमै ज्यान गयो । आफन्तका अनुसार टिपरले गलत लेन दायाँतर्फ ओभरटेक गरेर कारलाई ठक्कर दिएको थियो । तर घटनापछि मुचुल्का गर्न पुगेको जिल्ला प्रहरी कार्यालयको टोलीले कारकै गल्ती देखाएर मुचुल्का बनाएपछि आफन्तले क्षतिपूर्ति पाउन सकेका छैनन् ।

टिपरको ठक्करले चालक बस्ने सिट र ढोकातर्फको पुरै भाग छियाछिया भएको छ । मृतकका दाइ किशोर अधिकारीका अनुसार टिपरचालक, टिपरधनी र यातायात व्यवसायी धादिङकै भएकाले प्रहरीसँगै मिलेमतो गरी मुचुल्का बनाएका छन् । जसले पीडित पक्षले क्षतिपूर्ति तथा न्याय पाउन सकेका छैनन् । ‘म पनि गाडी चलाउँछु तर प्रहरीले गलत मुचुल्का बनाएको छ,’ उनले भने, ‘घटनास्थल हामीले पनि अवलोकन गरेका छौं, प्रहरीले गलत मुचुल्का उठाएको छ ।’

उनका अनुसार मृतक कार चालकका २ जना नाबालक छोरा छन् । अभिभावक नै गुमिसकेकाले उनीहरूलाई हुर्काउन तथा पढाउन आर्थिक समस्या देखिने भएपछि पीडित पक्षले क्षतिपूर्ति माग गरेका छन् । उनीहरूले ३० लाख रुपैयाँ दिन आग्रह गरेका छन् । तर यसबारे टिपरचालक, प्रहरी, टिपर धनीले बेवास्ता गरेको मृतकका दाइ अधिकारीले बताए । उनले घरको अवस्था पनि नाजुक भएको जानकारी दिए । ‘हामीसँग किरिया खर्चसमेत छैन, क्षतिपूर्ति दिए मान्छौं नत्र शव बुझ्दैनौं,’ उनले भने, ‘प्रहरीले नै हाम्रो मागप्रति चासो दिएको छैन ।’

दुर्घटनालगत्तै मृतक अधिकारीलाई मेडिसिटी अस्पताल ललितपुर लगिएको थियो । अस्पतालले घटनास्थलमै ज्यान गएको पुष्टि गरेको थियो । आफन्तले क्षतिपूर्ति नपाएसम्म शव नबुझ्ने बताएका छन् । टिपरले ठक्कर दिएर कार चालकको ज्यान गएपछि प्रहरीले टिपरचालक बुद्ध तामाङलाई पक्राउ गरेको छ ।

चालकलाई नियन्त्रणमा लिएर आफन्तलाई क्षतिपूर्ति दिलाउने जिम्मा प्रहरीको भए पनि प्रहरीले तामाङलाई हिरासतमा राखेर छाड्ने गरी मुद्दा अघि बढाएको पीडित पक्षको भनाइ छ । त्यसो त घटनालगत्तै टिपरचालक तामाङले मृतक अधिकारीको पर्स, मोबाइल घडी पनि आफूसितै राखेको आफन्तले बताए । मृतक अधिकारीले केही वर्षअघि ऋणमा कार किनेर भाडामा चलाउँदै आएका थिए ।यो समाचार आजको नागरिक दैनिकमा छ । फाइल तस्विर

Related Articles

Back to top button