News

पाँच दिन अस्पताल राख्दा एकजना कोरोना संक्रमितको २ लाख १७ हजार बिल

काठमाडौं । ह्याम्स अस्पतालले कोरोना संक्रमितको उपचारमा चर्को शुल्क उठाएको छ । आफ्ना चालक दलका सदस्यहरूको उपचारबापत ह्याम्सले मनलाग्दी शुल्क उठाएको भन्दै नेपाल वायुसेवा निगमले छानबिनका लागि स्वास्थ्य मन्त्रालयसँग माग गरेको छ । गत २२ असारमा निगमका चालक दलका सदस्यसहित १४ जनामा कोरोना संक्रमण देखिएको थियो । उनीहरूलाई ह्याम्स अस्पतालको आइसोलेसनमा राखेर पाँच दिनसम्म सामान्य उपचार गरिएको थियो । प्रतिदिन एकजनाको ३० हजार ९ सय रुपैयाँका दरले उनीहरूबाट रकम असुलिएको छ।

ह्याम्सले १४ जनाको पाँच दिनको २६ लाख ७१ हजार चार सय २६ रुपैयाँको बिल नेपाल वायुसेवा निगमलाई पठाएको छ । एकजना बिरामीबाट बेडचार्ज सात हजार पाँच सय, कोभिड चार्ज दश हजार, नर्सिङ चार्ज चार हजार आठ सय, डाक्टरको शुल्क तीन हजार, इन्फेक्सन कन्ट्रोल दुई हजार, हाउसकिपिङ दुई हजार, खाना तथा पेयपदार्थको एक हजार ६ सय गरी ३० हजार नौ सय उठाइएको छ । त्यसमा औषधिको शुल्क जोडेर प्रतिव्यक्ति न्यूनतम एक लाख ७८ हजार दुई सय ७६ देखि दुई लाख १७ हजार ६ सय १९ रुपैयाँसम्म उठाइएको छ।

स्वास्थ्य मन्त्रालयले कोरोनाको संक्रमितलाई उपचारका लागि साधारण, मध्यम र गम्भीर गरी तीन तहमा वर्गीकरण गरेको छ । मन्त्रालयका सहप्रवक्ता डा. समीर अधिकारीका अनुसार सामान्य संक्रमितको दैनिक उपचार खर्च सबै जोडेर १४ हजार पाँच सय ६ रुपैयाँ तोकिएको छ । यसमा पनि बिरामीले खाना, खाजा अस्पतालमा नखाए र स्वास्थ्यकर्मीले मेडिकल सामग्री ९मास्क, पिपिई, एचआर० नलगाउनुपर्ने अवस्थामा दैनिक खर्च ६ हजार ५२ रुपैयाँ मात्रै हुन्छ।

त्यस्तै, मध्यमखालका संक्रमितको उपचारका लागि सरकारले २३ हजार नौ सय ९३ रुपैयाँ तोकेको छ । गम्भीर अवस्थामा संक्रमितको उपचारका लागि दैनिक ३८ हजार एक सय १८ रुपैयाँ तोकेको छ । अस्पतालले अत्यधिक बिल पेस गरेको भन्दै निगमले छानबिनका लागि स्वास्थ्य मन्त्रालयलाई पत्राचार गरेको छ । ‘हामीलाई बिल अस्वाभाविक लागेपछि स्वास्थ्य मन्त्रालयलाई निवेदन गरेर छानबिनको माग गरेका छौँ,’ निगमकी प्रवक्ता अर्चना खड्काले भनिन्, ‘यो विषयमा गम्भीर छानबिन हुनुपर्छ ।’ नयाँपत्रिका दैनिकबाट

Related Articles

Back to top button
Close